Datorren larunbatean, ekainak 15, azken zazpi urteetan egin dugun bezala, Burlatako Kultura-aniztasunaren Eguna ospatuko dugu. Egun honen helburua gure herriko kultura-aniztasunaren berariazko aitorpena egitea da, Burlatako kultura-aniztasuna agerian utziz eta aniztasun horrek ematen digun aberastasun guztia erakutsiz. Jakina, ospakizun-eguna ere bada, urtean zehar aniztasun hori aitortzeko, arrazakeriaren eta xenofobiaren aurka borrokatzeko eta, batez ere, kulturen arteko bizikidetza sustatzeko egiten den lan guztia ospatzeko eguna.

Oraingoan, Burlatako karriketan zehar egiten den kalejira tradizionala burutuko da berriro ere, EH 11 Kolore ekimenaren parte hartzearekin, eta, kalejira haren inguruan egitaratuko da. Hainbat elkarte kultural, musikal, sozial, nazionalitate desberdinetakoak, dantza-taldeetakoak eta abar izanen dira, baita partikularrak ere. Jende guztiari irekita dago eta pertsona bakoitzaren jatorriari dagozkion jantzi tradizionalekin joatera animatzen dugu, bertakoak izan edo bost kontinenteetako edozeinetakoak izan.

Kalejira txupinazoarekin hasiko da, 18:00etan, Larrañetako plazan. Burlatan errotuta dagoen elkarte edo pertsona batek botako du, udalerriko kultura-aniztasunaren dinamikan aktiboki parte hartzen duena, ostegun honetan, Kultura-aniztasun eta Migrazio Atalean, Udaleko herritarren partaidetzarako kontseilu sektorialean, eginen den herri-hautaketaren ondoren.

Ondoren, honako toki hauetatik pasako da kalejira: Garbitzaileen kalea, Intxaustia, Nagusia, Ezkababide, Ezkabazabal plaza (geldialdi bat musika eta dantza emanaldietarako), gero Bentetako Erronda kalea, Azpa kontzejua, Landazabal kontzejua, Nagusia, Elizgibela, Ermita eta amaiera Gaztelekun. Bertan, musika eta dantza emanaldi batzuk, eta, kalera ematen duen agertokian, 20:00etatik aurrera, VozTalent Burlatdaren azken emanaldia izanen dugu, Hezkuntza eta Gazteria udal alorrarekin eta “Hilarión Eslava” Musika Eskolarekin batera garatutako proiektua. Proiektu honek 12 eta 16 urte bitarteko neska-mutilen kulturen arteko topaketa lortu nahi du musikaren bidez. DJ Katangaren musika saio batekin bukatuko dugu jaieguna.

Burlatako eta beste herri batzuetako herritar guztiak ospakizun honekin bat egitera animatzen ditugu, burlatarren arteko kohesio soziala erakusten jarraitzeko, jatorria edozein dela ere.