• Burlatako Udalak, Nafarroako Gobernuak eta Euskaltzaindiak Euskara Ibiltaria erakusketa interaktiboa aurkeztu dute herriko Kultur Etxearen Erakusketa Aretoan. Azaroaren 24ra arte izanen da zabalik eta sarrera doakoa da. Nafarroako Gobernuaren eta Laboral Kutxaren babesa du erakusketak.
• Euskara Ibiltaria erakusketa interaktiboaren abiapuntua Euskaltzaindiaren Euskararen Herri Hizkeren Atlasa (EHHA) da, eta azken urteotan egindako argitalpenak erakusten duten lez, herritik jasotako euskararen aniztasuna eta aberastasuna berriz herrira ekarri eta erakustea du helburu.
• Doako bisita gidatuak azaroaren 9an, 14an eta 20an izanen dira. Izen-ematea: 660548779 / euskara@burlada.es

Euskara Ibiltaria erakusketa interaktiboa Burlatan izanen da, gaurtik hasi eta azaroaren 24ra bitarte.

Mapak, jokoak, animazioak, entzungaiak…

Erakusketa ibiltariaren abiapuntua Euskaltzaindiaren Euskararen Herri Hizkeren Atlasa da, eta azken urteotan plazaratutako argitalpenak azaleratu bezala, euskararen ugaritasuna eta aberastasuna erakustea du helburu (lexiko mailan, izen-morfologia zein aditz-morfologia esparruetan eta sintaxia alorrean). Hala, Euskaltzaindiak gizarteari itzuli egin nahi dio atlasa egiteko euskal gizartearengandik jasotako jakituria.

Erakusketa bost atal nagusitan banaturik dago —Tokiak, Materialak, Argia eta soinua, Natura, eta Bizitza—, eta atal bakoitza atlaseko mapen hautaketa batek hornitua da, hala, bisitaria begi-kolpe bakar batez hizkuntza-aldaera horien guztien jabe egingo da. Horrezaz ostean, jokoak, animazioak eta entzungai gisako tresnak ere erabiltzen ditu erakusketak herri-hizkeren aberastasunean murgiltzeko.

Ordutegiak eta bisita gidatuak

Erakusketa azaroaren 24ra arte izanen da zabalik, astelehenetik ostiralera (17:00-21:00) eta larunbatetan (19:00-21:00).

Doako bisita gidatuak ere antolatu dira, data hauetan:

• Azaroaren 9an (larunbata), 12:00etan
• Azaroaren 14an (osteguna), 19:00etan
• Azaroaren 20an (asteazkena), 19:00etan

Bisita hauetan parte hartu nahi duen orok 660548779 telefono zenbakira deituz edo euskara@burlada.es posta elektronikora idatziz gorde beharko du lekua.