Ayuntamiento de Burlada / Burlatako Udala

2021eko uztailak 9

Murchanteko hilketa matxistaren adierazpen instituzionala

Foto noticia

Burlatako Udalak etengabe gaitzestu ditu gure udalerrian izan diren eraso matxista ezberdinak. Bai delituzko jokabide hauen gaitzespena, bai erasoak jasan dituzten emakumeei babesa eta elkartasuna adieraztea momentu ezberdinetan, gure inguruan gertatu diren hainbat gertakarien aurrean.

Pasa den uztailaren 7an, Murchanteko udalerriko emakume baten hilketa matxistaren aurrean, Burlatako Udaleko talde guztiek gure arbuio eta gaitzespen erabatekoa adierazi nahi dugu.

Emakumeen aurkako indarkeriak emakume guztiei eragiten die, adina, egoera sozioekonomikoa edo nazionalitatea bereizi gabe. Berriro adierazi nahi dugu indarkeria matxista botere-harremanetan oinarritzen dela, eta harreman horiek, maila sinboliko eta materialean, gizonak emakumeen gainetik jartzen dituztela eta haien helburua dela emakumeak gizonen aurrean mendetasun-egoeran bizitzea iraunaraztea. Emakumeen aurkako indarkeria horiek hainbat forma eta jarrera dituzte, eta kalte edo sufrimendu fisiko, psikologiko, sexual edo ekonomikoak eragin ditzakete. Ezinbestekoa eta premiazkoa da horietako bakoitza detektatzea, ikusaraztea, arbuiatzea eta gaitzestea, emakumeen aurkako indarkeria-adierazpen guztien prebentzioan osoki lan egiteko.

Horregatik, Burlatako Udalak honako adierazpen hau egin nahi du:

  • Murchanteko emakume honen hilketa arbuiatzen eta gaitzesten dugu, eta babesa eta elkartasuna adierazten diegu une zail hauetan hildakoaren familiari eta gertuko inguruneari.
  • Murchanteko Udalari eta bertako bizilagunei gure babesa eta konpromisoa adierazten diegu emakumeen aurkako edozein indarkeria-motaren aurkako borrokan.
  • Berretsi egiten dugu, beste behin ere, gure gizartean gertatzen den edozein eraso, indarkeria edo jarrera sexista arbuiatzen eta gaitzesten dugula, eta konpromisoa hartzen dugu lankidetzan aritzeko emakumeek jasaten dituzten indarkeriak ezabatzeko, erakundeen erantzuna hobetzeko eta emakumeek era guztietako inguruneetan askatasun osoa izan dezaten bermatzeko.
  • Erakunde publiko eta herritar gisa, konpromisoa hartzen dugu emakumeek jasaten dituzten indarkeria-moten aurrean jarrera aktiboa izateko eta indarkeria mota horiek prebenitzeko eta ikusarazteko lan egiteko.
  • Gizarte osoa animatzen dugu emakumeen eta gizonen arteko desberdintasuna iraunarazten duten rol eta estereotipo sexistetan oinarritutako kultura-eredua aldatzera, bai eta indarkeria matxista gaitzesten eta indarkeria matxistetatik bizirik atera diren emakumeei babesa ematen jarraitzera ere.
  • Herritarrak gonbidatzen ditugu emakumeek jasaten dituzten indarkeria-moten aurrean geldirik ez egotera, eta emakumeek segurtasunez eta askatasunez bizitzeko duten eskubidea aldarrikatzen dugu.

Burlatako Udalak indarkeria sexista oro gaitzesten du eta jarrera horiek irmo eta aktiboki arbuiatzen ditu, eta gure elkartasuna eta babesa adierazten diogu Murchanteko Udalari une honetan. Azkenik, egiten diren gaitzespen-jakinarazpen eta deialdiekin bat egin nahi dugu, eta mugimendu feministak eta emakumeen elkarteek deitzen dituzten protesta-ekitaldietan parte hartzera gonbidatzen ditugu herritarrak.

ERLAZIONATUTAKO BERRIAK

Imagen Antzerki-tailerra

Antzerki-tailerra

Antzerki tailerrak 2019an ekin zion bere ibilbideari eta hiru antzezlan antzeztu ditu jada. Bada talde egonkor bat alderdi artistiko horretan trebatu nahi duten pertsona...

Volver arriba